Xineru 2014 / Gozón

P. FERNÁNDEZ (Antromero)

«El Ayuntamiento nos da largas, está a pasar de todo», diz Alfonso Quintana. El presidente de l’asociación de vecinos d’Antromero quéxase de la pasividá del equipu de Gobiernu a la hora d’iguar pequeñes obres na parroquia. Ún de los sos pidimientos yera que colocaren señales nel camín de La Flor para que los coches amenorguen la velocidá, por mor de que l’asfaltu ta resquebraxao y pue llegar a ser un peligru. 

L’asociación tamién plantegó que volvieren a poner un cachu de cera que ta cabo la marquesina d’autobús, delantre del hotel San Pedro. Al parecer, ficieron nel so día un rebaxe pa la entrada a una finca, pero agora yá nun entren per ehí. «Ye un peligru porque coincide cola baxada de les persones del autobús y el suelu queda a muncha altura. Los mayores puen caer», alvierte.

La falta de soluciones por parte’l Consistoriu afecta tamién a una de les zones más concurríes d’Antromero: La Playa San Pedro. L’arenal sufrió un argayu en mayu de 2013 y «mandaron a la Policía Local para que pusiera una señal de prohibido el paso». Los turistes nun entendíen que la playa tuviera cerrada. El presidente vecinal consideró entós que la meyor opción sedría llendar la zona argayada pa evitar que nueves cayíes de tierra afectaren a los bañistes, pero tampoco hebo respuesta. 

San Pedro tien otru problema. «Un pequeño manantial se mete por el camino, lo que crea verdín y la gente resbala. Solo tenían que hacer una zanja y limpiar el borde para encauzarlo», razona Quintana, que diz que la única respuesta del edil de Mediu Rural foi: «Bueno, estamos en ello».