Gauzón y Villa de Luanco abarquen

el 68% de les ayudes deportives

Los dos clubes recibirán, en conxuntu, 10.900 euros de los 16.000 de la partida

Xineru 2014 / Deportes

PAULA FERNÁNDEZ (Lluanco)

La Sociedad Deportiva Gauzón y el Club Deportivo Villa de Luanco abarquen el 68,12% de les subvenciones deportives. Los dos clubes percibirán, en conxuntu, 10.900 euros (5.900 el primeru y 5.000 el segundu) de los 16.000 euros de la partida que Manuel Alberto Martínez Matías planificó pa 2013. L’edil del área destaca la subida en dalgún casu de 2.000 a 5.000 euros.

El repartu alcordóse nuna Comisión celebrada a finales de payares, que salió alantre gracies a los votos de PP y Foro. El restu del montante repartióse ente otros siete clubes, qu’ingresarán l’ayuda «en enero o febrero».

El decretu d’alcaldía plasma que’l Club Náutico algamará 3.500 euros, «que se suman a otros 5.000 y a la recaudación de las fiestas de Santa Ana». El Grupo de Montaña Peñes y el Grupo de Senderismo del Centru Social pa Mayores contarán con 400 euros caún. Completen el llistáu, con 200 euros, otres entidaes como l’Asociación Deportiva y Cultural Las Dunas de Verdicio, el Club Pruga d’Orientación, Verdicio Pescamar y la Peña Cicloturista Manuel Antonio García García.

Martínez Matías tamién subraya que siguirá cediendo a los clubes les instalaciones de Miramar, Balbín y el polideportivu Jenaro Fernández Diego pa evitar qu’haya problemes a la hora de presentar les factures de lluz, agua y otros gastos corrientes de los entrenamientos y partíos. El Consistoriu nun inclúi nesta distribución a otres entidaes coles que firmaron un conveniu aparte. Ye’l casu del Marino, que lleva 45.000 euros (10.000 menos que l’añu pasáu); el Gozón C. F., con 8.000; l’asociación de cazadores de Gozón, con 2.000; o’l Podes C.F., que pasó d’ingresar 3.000 euros a 5.000.

La conceyalía de Deportes tamién fizo frente a otros gastos como’l Tenis Playa, que costó 36.300 euros, l’Hípicu (20.000) o un desembolsu de 2.000 euros pa que los cazadores del conceyu repueblen la fauna autóctona. El presupuestu inclúi otros conceptos, como 75.000 euros p’ameyorar el polideportivu y otros 13.000 euros pa comprar equipamientu pal ximnasiu.

Martínez Matías esplica que’l retrasu a la hora d’aprobar y pagar les subvenciones de 2013 débese a que «los clubes cobraron las del año pasado en mayo y para darlas tienen que presentar las facturas de todo lo que gastaron». Pela so parte, espera contar col mesmu presupuestu pa 2014, pa poder reponer el techu de policarbonatos del Jenaro Fernández Diego, yá que «el Principado y el Ministerio dicen que no tienen dinero».