Númberu 104. Xineru 2014

Acábase l’añu 30 de la hestoria del Grupu de Baille Tradicional San Félix y entama’l 31, un añu pal que, de primeres, nun tenemos nada previsto, a nun ser facer delles sesiones más de «Palabres». L’espectáculu sabemos que tien entamu y final, l’entamu nel añu 30 y el final nel añu 31. Pero vamos siguir trabayando, y vamos amosar, como siempre, a lo llargo de 2014, dalguna novedá más.

31 años nun se cumplen tolos díes pa una asociación como la nuestra. Poro, quiero agradecer a toles persones qu’anguaño son parte de l’asociación tol enfotu que punxeron, ponen y van siguir poniendo en tolo que llevemos alantre. Sobre manera, porque ye lo que tenemos más cerca, en «Palabres». Ensin ellos, esti suañu nel que siguimos nun diba ser posible. 

Munchos de los qu’iguamos el Grupu de Baille Tradicional San Félix llevamos munchos años xuntos y siguimos aguantándonos, coles nuestres virtúes y los nuestros defectos. Y la xente que nun lleva tantos años amiéstase con munches ganes, intentando ser parte d’esa manera conxunta que tenemos de dar la vida. Tamién, como fin del 30 aniversariu, préstame dar les gracies a toes aquelles persones que fueron parte del Grupu de Baille Tradicional San Félix, unos échense de menos y otros ayudáronnos a deprender de lo difícil que pue llegar a ser la vida. Por último, recordar a les dos persones a les que ta dedicao «Palabres». Fini Suárez, úna de les meyores pandereteres de lo cabero del sieglu XX, y Ana Álvarez Solla, collacia de tantos y tantos momentos. D’elles deprendimos, y a elles vamos siguir dedicando tolo que faigamos nesti añu 31 qu’agora entama, y en tolos que vengan depués.