La sala d’estudios de la biblioteca, ensin fecha d’apertura

por falta d’enchufes

L’Ayuntamientu «nun pue pagar 1.000

euros» p’acabar la instalación eléctrica

Febreru 2014 / Gozón

PAULA FERNÁNDEZ (Lluanco)

La nueva sala d’estudios de la biblioteca de Lluanco entá nun tien fecha d’apertura por falta d’enchufes. Los escritorios nun cuenten con entrada a la rede eléctrica, colo que los usuarios nun podríen repasar apuntes con lluz artificial, nin conectar cualquier dispositivu electrónicu como ordenadores o tablets.

El local, allugáu na primer planta del edificiu del parque Zapardel, iguóse a finales de 2013 cola idea d’albergar a 40 estudiantes. El conceyal de Cultura, José María Ovies Alonso, xustificaba la obra porque «la sala de exposiciones estaba prácticamente inutilizada porque los artistas no querían hacer muestras aquí. Preferían sitios más céntricos». Agora, nin lo uno nin lo otro. El sitiu sigue ensin usu.

El problema de la falta d’enchufes débese, al paecer, a la situación económica del Ayuntamientu. La remodelación contemplaba la compra de moblame por valir d’unos 12.000 euros, a los qu’habría que sumar el gastu de la instalación eléctrica con tomes individuales y la implantación de zona wifi. Les meses nueves yá llegaron al edificiu, pero paez que se quedaron ensin dineru pa completar l’arreglu. «Encargaron un presupuesto para comprar los materiales, que luego colocarían los trabajadores del Ayuntamiento. Al final dijeron que no podían pagar los 1.000 euros que costaba», comenta Manuel Artime Suárez, delegáu de prevención de la Unión Xeneral de Trabayadores (UXT) nel Consistoriu.

Lo qu’en setiembre de 2013 víase como una reforma clave pa desconxestionar la biblioteca lluanquina, quedó nuna obra a medies. La reparación d’otres zones del edificiu de Zapardel tampoco sirvió pa solucionar los problemes de goteres. Y ye que, según esti sindicatu, «hay que reparar el tejado y tampoco tienen presupuesto».

Mientres tanto, los usuarios consulten llibros y estudien nunes habitaciones con humedanza. Tampoco acaben de llimpiar el verdín de la rampla d’entrada nin arreglan el bañu de minusválidos, que lleva más d’un añu estropiáu.

PRIESES POL PLAN DE CHOQUE

Hai priesa por ver los resultaos del plan de choque anunciáu pol alcalde a finales de 2013. Ramón Artime encargó un llistáu de deficiencies pa la so reparación por operarios municipales, pero too sigue como siempre.

Los lluanquinos urxen, polo tanto, que l’Ayuntamientu se ponga a trabayar cuanto enantes pa llava-y la cara a la villa marinera. Piden la reparación de delles estructures del edificiu consistorial, que pol pasu de los años y los actos de vandalismu, ufierten una imaxe impropia d’un inmueble d’eses característiques, y más entá cuando adecentaron la parte delantera de la plaza la Villa y sacaron a concursu la axudicación de les obres del aparcamientu cabo la estación d’autobuses.

Per otra parte, el robu de cobre tamién afectó a otros inmuebles, como la Casa la Escribana, y l’Ayuntamientu, onde entá nun repunxeron los canalones. Más de lo mesmo pasa con otres partes del moblame urbanu. Como exemplu, la tapa d’una arqueta del parque Zapardel ta rota, lo que pue llegar a provocar que dalguién sufra una mala cayida.