Númberu 105. Febreru 2014

LLETRES D'ANTES, MARCHA D'AGORA

La charanga «Pepe El Chelo» versionará temes populares

con ritmos modernos na grabación del so segundu discu

Febreru 2014 / Carreño

PAULA FERNÁNDEZ (Candás)

Les lletres d’enantes tendrán ritmos musicales d’agora. «Pepe El Chelo» ultima los preparativos pa entamar a grabar el so segundu discu nel qu’habrá cantares populares de Candás «versionadas y con más marcha», avanza Álvaro Artime Sal. La charanga, que cumple 55 años, meteráse dafechu, depués del antroxu, nesti proyeutu que previsiblemente s’asoleya n’agostu, coincidiendo col Festival de La Sardina y les Fiestes de San Félix. Tamién habrá nesta compilación otros temas de merengue, cumbia y pasodoble. «Hay que dar un poco de alegría a estos tiempos que corren», diz.

La popular fanfarria candasina espera que l’Ayuntamientu de Carreño patrocine’l trabayu discográficu.

«Pedimos 1.800 euros para pagar parte de lo que nos cuesta y así poder venderlo a la gente por cinco euros», comenta Álvaro. El Consistorio recibiría 60 exemplares y el compromisu de dar la meyor imaxe del conceyu porque la carátula del nuevu trabayu tendrá imáxenes del conceyu. «La idea es promocionar Carreño, que vean lo guapo que es, además de contar un poco la historia del concejo a través de la charanga», diz.

El batería Fernando Arias va llevar la direición de los 30 integrantes de la fanfarria nel estudiu de grabación. Esti músico collaboró con artistes como Víctor Manuel, Ana Belén, Kepa Junkera, Andreas Prittwitz o Béla Fleck. Amás, ye’l percusionista principal de la Orquesta Sinfónica Uviéu Filarmónica.

«Pepe El Chelo» entá nun decidió’l títulu del nuevu álbum, pero deseen «que diga que seguimos aquí, más activos que nunca, contando años, con la marcha en el cuerpo», comenta Álvaro.

La entidá candasina quier siguir dando la nota con un nuevu trabayu discográficu cada cinco años. El primer discu, de nome «50 años», coincidió precisamente col aniversariu de l’agrupación, que surdió en Candás de la mano d’un grupu de miembros de la Banda de Música de Candás que, con motivu de les celebraciones del Cristo y la fiesta de los toros na playa, decidieron salir a tocar pa pasalo bien.

El sofitu institucional ye mui importante y non sólo pa que vea la lluz esti segundu discu. La fanfarria pidió tamién al Ayuntamientu qu’igüen un local d’ensayu, ya que’l d’anguaño, allugáu nun baxu del barriu d’El Nodo (onde antaño había una guardería), ta enllén d’humedanza. Esti problema afecta a la economía de la entidá, yá que tuvieron que reponer dellos instrumentos. «Compramos una tuba de más de 3.000 euros porque las otras están estropeadas de la humedad. Además de una trompeta y una batería», relata Álvaro. El conceyal de festeyos, José Manuel Muñiz «Colón», comprometióse en xineru a iguar les deficiencies; y yá encargó a la oficina d’urbanismu un plan d’obres pal local.