La racha de los atletes de Peñes

Aldara Álvarez algamó el bronce nel nacional Promeses

y cuatro veteranos del Ocle fueron oru nel asturianu

Marzu 2014 / Deportes

PAULA FERNÁNDEZ (Peñes)

Los atletes de la Comarca siguen sumando éxitos allá onde van. La candasina Aldara Álvarez Fuentes algamó’l bronce nel XXVII Campeonatu d’España Promeses en pista cubierta, celebráu’l 8 y 9 de febreru n’Antequera (Málaga). La llanzadora de pesu unvió la bola de cuatro kilos a 12,75 metros. La so meyor tirada foi la tercera de les seis que fizo, y nun tuvo nengún nulu en tola prueba nacional. Esta atleta moza compitió col nome del Ría Ferrol-C. Arenal. Marta Fernández Álvarez nun tuvo la mesma suerte en 400 metros llisos el 8 de febreru. La lluanquina, del F. C. Barcelona, quedó cuarta na segunda semifinal con una marca de 1:00:58. Esta velocista reconocía al entamu la temporada que nun taba nuna perfeuta forma física pa encarar campeonatos a nivel nacional. Pero algamó quedar ente les primeres na prueba que disputó.

Los veteranos tamién dexaron bien altu’l nome de la Comarca. Cuatro atletes del club Ocle de Carreño ganaron na so categoría nes pruebes de pista cubierta del campeonatu d’Asturies celebraes el 15 y 16 de febreru nel Palaciu los Deportes d’Uviéu.

María Area algamó los máximos honores en 60 y 200 metros llisos en W-65. El so hermanu Rafa (M-60) algamó’l mesmu resultáu en 800.

Otres dos muyeres del Ocle quedaron primeres en delles pruebes. Pilar Sánchez (W-60) fízolo en 60, 200 y 400 metros llisos, mientres Ana Cristina Aguado Mori algamó la primer plaza de W-50 en 800 y 3.000 metros. Agora toca’l Campeonatu d’España, que sedrá’l 8 y 9 de marzu en Zaragoza, y al que, pel momentu, dirá María Area.

PERLORÍN

Julio César Álvarez algamó la meyor posición en 3.000 metros, y quedó sestu nel Campeonatu Absolutu de Cross d’Asturies, disputáu nel recintu deportivu de La Morgal el 8 de febreru. Esta cita valió-y pa dir convocáu cola seleición asturiana de cross, que’l próximu 16 de marzu participará nel campeonatu d’España por autonomíes y individual en Mérida. El perlorín espera participar el día 2 de marzu nel nacional de cross por clubes de Marina D’or (Castellón).

José María Cáceres, compañeru de Julio César, algamó’l cuartu puestu na media maratón «Corazón d’Asturies» con una marca d’una hora y 13 minutos. Unos resultaos que faen ver la calidá de los atletes de la Comarca