400 MANDILONES PAL SÁH.ARA

José Manuel Muñiz «Colón» busca prendes para Guelta

Marzu 2014 / Carreño

PAULA FERNÁNDEZ(Candás)

Quier llegar a les 400 unidaes. José Manuel Muñiz «Colón» fai una llamamientu a los vecinos pa qu’ayuden al Ayuntamientu a compilar mandilones pa neños ente tres y nueve años pa llevalos en barcu a la comunidá de Guelta (El Aaiún), llugar hermanáu con Carreño.

El conceyal de Turismu, Festexos y Deportes entamó una campaña de recoyida d’estes prendes d’usu escolar nos centros educativos del conceyu porque’l propiu alcalde d’esti pueblu del Sáh.ara pidió-ylo nun alcuentru previu. L’edil tamién busca’l sofitu d’empreses allugaes en Carreño pa poder unviar pupitres a África, col envís d’ameyorar la educación d’unos neños que viven en plenu desiertu.

«Colón» espera visitar el barriu de Guelta xunto cola Asociación d’Amigos del Pueblu Sah.araui ente’l 1 y el 8 de marzu. Diba aprovechar el viaxe para dar los 3.700 euros que l’Ayuntamientu reserva d’ayuda para esti pueblu. «Sale más barato que compremos allí alimentos y medicinas para los niños y las personas mayores, siempre teniendo en cuenta las necesidades que nos comente el alcalde. Miel, aceite, leche y pasta son los productos más reclamados», diz.

El Consistoriu nun pudo facer frente nel pasáu a otros pidimientos muncho más costosos. «Querían que montásemos un centro de jubilados con el nombre de Luis Miranda en 2011, pero eso sería una inversión importante, de más de 100.000 euros, a la que no podemos hacer frente», llamenta.

Les espediciones al Sáh.ara del conceyal socialista son habituales. Yá lleva cuatro viaxes nos últimos años. Toos col oxetivu d’ayudar a la comunidá oprimida. Fai les veces d’embaxador solidariu. Visita dellos campamentos, hospitales y escueles pa treslladar al equipu de Gobiernu de Carreño les necesidaes más urxentes. Carreño ya mandó dellos cargamentos de alimentos, amás de xuguetes y otros oxetos útiles.

L’Ayuntamientu tamién aprovechará la primavera pa llevar alantre una campaña de concienciación ente los neños sobre la problemática d’esta zona. Repartiránse cientos d’exemplares peles escueles de «El Conflicto del Sáhara», un llibru infantil en formatu cómic qu’esplica con dibuxos y mensaxes mui concretos en qué consistió la ocupación de Marruecos d’esti territoriu y la situación anguaño de los sos residentes. Amás, tamién s’espera que’l Centru Polivalente «La Baragaña» amuese una esposición de semeyes y un alderique sobre esta temática en branu. La fecha ta entá ensin marcar