Númberu 108. Mayu 2014

Dos sentencies paralicen el cobru de los terrenos espropiados

de Balbín

La xusticia diz que los antiguos

dueños deben esperar a que s’afite

la cantidá que valen las fincas

Mayo 2014 / Gozón

PAULA FERNÁNDEZ (Luanco)

Dos sentencies de los xulgaos de lo Contencioso-Alministrativo númberu 1 y 5 d’Uviéu paralicen el cobru de los terrenos espropiaos pa construyir el Complexu Deportivu de Balbín. Ún de los testos llegales, fecháu’l 8 de xineru, fala de que la dueña d’una finca reclamaba 43.032,20 euros, cantidá que considera «límite en que existe conformidad de acuerdo a la hoja de aprecio formulada por el Ayuntamiento». La propietaria pidiera daquella 430.236,81 euros y el Consistoriu de Gozón cifraba la espropiación nun importe mui distintu: 35.099,61 euros. Al nun haber alcuerdu ente les partes, el xuiciu sigue en cursu.

Los espropiaos esperen agora que l’Ayuntamientu-yos pague el preciu que considere y, cuando la xusticia diga si la cantidá ye superior o non, reembolsar el restu del dineru. El xuez, sicasí, considera que l’importe debe ponese previamente, dalgo que ta a la espera de que lo determinen los Tribunales.

Les dos partes amosaron daquella que taben en contra de la tasación que fizo’l Xuráu d’Espropiación del Principáu d’Asturies. A los dueños paecía-yos un importe inferior a lo que valíen les sos finques y el Consistoriu opinaba tolo contrario. El maxistráu añade que los antiguos dueños de los terrenos de Balbín tienen qu’esperar a que se determine’l valir del metru cuadráu de les sos finques.

Más de lo mesmo pasa cola segunda sentencia, emitida una selmana depués. Nella, seis propietarios reclamen 319.667,25 euros. Nesti casu, los dueños tasaben les sos finques en 3.463.097,26 euros, cantidá que’l Consistoriu gozoniegu rebaxaba a 282.526,67 euros, al valorar el metru cuadráu en 16,34 euros.

Entrambes sentencies aplacen el cobru de les espropiaciones de Balbín hasta que los Tribunales dictaminen cuánto valen. Mientres tanto, los propietarios tendrán qu’esperar. La oposición yá encamentó al equipu de Gobiernu en delles ocasiones pa que guardara una partida nel presupuestu que contemplara esti pagu. Y ye que cuando la Xusticia aclare l’asuntu, l ‘Ayuntamientu tendrá que facer frente a más d’un millón d’euros de gastos, na meyor de les situaciones. Los socialistes esperen que nes cuentes de 2014 apaeza esta cantidá. «Están obligados por ley a reservar un dinero a esto porque se considera una deuda del Ayuntamiento», valora Jorge Suárez. Pel momentu nada se sabe sobre a qué van a destinar los ingresos municipales, yá que la conceyalía de Facienda entá nun treslladadó un borrador indicando los ingresos y gastos del Consistoriu.