Númberu 109. Xunu 2014

Una ordenanza prevé desaniciar pasu a pasu los ocalitos

La Corporación abordará’l testu en xunu, que llenda les distancies a les que puen tar estos árboles

Xunu 2014 / Carreño

P. FERNÁNDEZ (Candás)

Una ordenanza municipal plantega acabar progresivamente coles plantaciones d’ocalitos, que ocupen un 90% de la superficie del suelu forestal arboláu del conceyu. Compromisu por Carreño plantega aprobar esti documentu, que se discutirá en xunu ente tolos partíos de la Corporación, y forma parte del alcuerdu de 14 puntos firmáu ente l’equipu de Gobiernu y esta formación. L’oxetivu del testu ye «regular les distancies que tienen que respetar les plantaciones forestales con finques vecines, edificaciones y estremaes infraestructures», esplica Roberto Holgado. Amás, el partíu nacionaliegu quier con esto dar puxu a los árboles con certificación forestal sostenible.

La eliminación pasu ente pasu de los ocalitos ye ún de los asuntos que quieren consensuar col restu de grupos, anque de primeres creen qu’una opción sedría «que toles plantaciones fueren amoldándose a les distancies que marca la ordenanza aprovechando los turnos de corta, que son cadau 10 o 12 años nel casu de los ocalitos», conseña Holgado.

Roberto Holgado. (L. VENTURA)

Les distancies que marca la ordenanza son: 75 metros con viviendes y otras edificaciones; 15 metros a calces fluviales, pozos y fontes, asina como a finques vecines plantaes con especies d’otru xéneru o finques agrícoles. Estos árboles de medría rápida (triba ocalitu) tendrán que tar, amás, a más de 10 metros de praderes vecines y a más de cinco de finques con especies del mesmu xéneru o caminos públicos.

L’oxetivu d’apostar poles plantaciones sostenibles tocaráse nun alderique que se va celebrar el 15 de xunu onde se darán a conocer a los propietarios forestales qué ye esta certificación y los beneficios que supón. Ente ellos, Holgado avanza que «los compradores paguen una prima d’ente tres y nueve euros por tonelada más, que la madera ensin certificar»