Númberu 110. Xunetu 2014

Podio masculinu de la I Carrera La Marinera, que llevaron un túnidu como parte del premiu. (C. A. O.)

Los veteranos ganen na I Carrera La Marinera

Tres atletes que superen los 36 años algamaron la primer, segunda y tercer plaza na clasificación por sexos

Xunetu 2014 / Deportes

PAULA FERNÁNDEZ (Candás)

Los veteranos ganaron na clasificación xeneral na I Carrera La Marinera, celebrada peles cais de Candás la mañana del 8 de xunetu. Elvira Longo González, del Asdeco Digital, algamó la primer plaza de les muyeres. L’atleta, de la categoría Veteranos A (ente 36 y 39 años) fizo una marca de 30:22.58. Laura Fernández Alonso, de la Sociedad Cultural y Deportiva Ribadesella; y María Suárez García, del Universidad de Oviedo, entrambes Sénior, completen el podiu.

Emilio Llamedo Iglesias, de la Sociedad Cultural y Deportiva Ribadesella, foi líder al entrar a meta a los 25 minutos y 43,35 segundos. Pocu tiempu depués fizo lo propio Julio César Álvarez García, atleta perlorín del Universidad de Oviedo, qu’algamó un bronce y foi’l meyor de los Veteranos B.

Otru de los sos compañeros de categoría, Juan Manuel Pezón Menéndez, del Grupo de Cultura Covadonga, quedó terceru na xeneral. Los tres tuvieron rexistros asemeyaos, yá que corrieron a una velocidá de poco más de tres minutos por kilómetru, pa completar los ocho totales que marcaba’l percorríu.

La prueba contó con 176 atletes participantes, de los que 50 yeren muyeres y 106 homes. Nesta xornada, marcada pola calor, tamién se celebró’l XI Cross Infantil, nel que compitieron 170 corredores de diferentes categoríes nun circuitu urbanu per Candás. Tamién participaron persones del Centru d’ Apoyu a la Integración de Candás.

El Club Atlético Ocle entamó la I Carrera La Marinera esclusivamente en Carreño «por las limitaciones que puso la Federación Asturiana de Atletismo» pa que se desendolcara ente Lluanco y Candás, como yera davezu. Y ye que la Direición Xeneral de Tráficu nun daba’l permisu ensin el preste de la mentada federación, qu’exixía, al empar, «un aval de 2.000 euros» y que «los seguros para los corredores fueran contratados con la compañía que ellos marcarsen y que eran sensiblemente más altos que el resto de compañías».