Númberu 111. Agostu 2014

La basura atrópase. Un cartelu nun contenedor que diz: «No depositar residuos fuera, no los recogen». (P. FERNÁNDEZ)

Antromero quéxase del estáu de la so sienda costera y de l’ acumulación de basura nes playes

Complicaos accesos a pie a les

playes d’El Cuirno, El Sombrao,

Los Cristales y La Gargantera

Agostu 2014 / Gozón

PAULA FERNÁNDEZ (Antromero)

Antromero quéxase de los complicaos accesos a les playes, del mal estáu de la so sienda costera y de l’acumulación de basura nes playes.En cuanto a la entrada a los arenales, por exemplu, dir a La Gargantera conlleva atravesar una zona de viesca, qu’entama al llau del aparcamientu que ta cabo Los Cristales, onde tamién hai problemes polos desprendimientos de peñes. Por eso, son pocos los que s’atreven a baxar a pegase un calumbón. Inconvenientes a pares pa dir a les d’El Cuirno y El Sombrao. Hai puntos d’esta ruta a pie, que s’habilitó nel so día gracies a la financiación del Consorciu Costa Norte, intransitables porque los artos lleguen al metru d’altura.

Amás, los propios vecinos punxeron midíes de seguranza pa evitar cayíes nel trayectu que llenda colos cantiles pola cayida d’argayos. Una vez que los bañistes son a llegar a los arenales en cuestión, les baxaes son insegures, sobre manera n’El Sombrao.

Los usuarios y vecinos d’Antromero consideren que les alministraciones deberíen recuperar, polo menos, la sienda que se proyectó hai años pa xunir Candás con Lluanco. «Pasa por unos lugares muy bonitos, un verdadero paraíso, pero impracticables», valora Diego Cavia Castro. Antromero reclama tamién mayor llimpieza na contorna de la playa de San Pedro.

L’accesu al arenal acumula basura de toa mena, sobre manera en branu. El problema ye que, a la falta de civismu de unos xúntase que los contenedores tán asitiaos lloñe de la entrada a la playa.

Mientres llega una solución, los habituales viéronse obligaos a adecentar esta zona, una situación que criticaron en xunetu al traviés de les redes sociales. «Hoy sacamos 20 kilos de basura entre tres personas. La gente lo deja allí pensando en que van a venir a por ello y no es así», critica Diego. Él dexó un escritu de la situación el 16 de xunetu nel buzón de suxerencias de la web municipal, anque entá nun recibió respuesta.

El mozu nun entiende que’l Consistoriu nun mande davezu a personal de llimpieza o busque alternatives como «la instalación d’un puntu llimpiu».