112_xurde_goico

Númberu 112. Setiembre 2014

La nuesa Cultura

por XURDE FERNÁNDEZ

Goico-Aguirre

Faustino Goicoechea Aguirre (1906-1987) foi pintor, escultor y ilustrador, de xuru qu’ún de los más importantes artistes asturianos del sieglu XX. Bona parte de la so obra pue vese dientro del Muséu de Belles Artes d’Uviéu o fuera del antiguu Institutu Nacional de Previsión d’Uviéu.

Siempre oyí falar en casa de Goico-Aguirre, siempre vi los recortes de les caricatures que facía nel periódicu Avance (el so posicionamientu republicanu llevólu a delles penes de muerte que-y conmutaron por cinco años de cárcel)... Cuando en 2008 el programa de TPA Pieces quixo que yo comentara un cuadru del Muséu de Belles Artes tuvi perclaro que diba escoyer unu de Goico Aguirre; anque nel archivu nun atopé nenguna caricatura, sí atopé un horru pintáu en negro con unos pocos trazos que foi l’escoyíu.

Siempre vi los recortes

de les caricatures que facía

nel periódicu Avance

Esi videu que yo cuasi tenía escayecíu y del que namás recordaba los munchos problemes que tuviéremos na grabación (polo difícil que sigue siendo entá facer televisión n’asturianu) ye’l culpable de que yo escriba esti artículu sobre l’artista asturianu.

Goico Aguirre y la so familia vivieron en Podes nos años trenta, yá que la so muyer, Julia Suárez del Otero, yera la maestra del pueblu; y con ellos «sirviendo» trabayó mio güela hasta qu’ellos dexaron el pueblu.

Esi videu que yo cuasi tenía escayecíu viéronlu (casualidaes, siempre casualidaes) los descendientes de Goico-Aguirre en Madrid esti mes d’agostu y contautaron conmigo al traviés d’internet ensin saber que yo yera descendiente d’aquella muyer de Podes qu’ellos nun escayeceren.

El 18 d’agostu vímonos delantre d’aquella escuela yá cerrada, d’aquella casa yá cerrada y entamamos a falar d’alcordances del pasáu que yá son del presente. Traxéronnos semeyes vieyes que yo nun conocía, yo regalé-yos un volume de Volver, ensin esi llibru de xuru que nada diba ser como ye.