Númberu 115. Avientu 2014

La so mala instalación dexa inservibles los badenes de la Avenida del Gayo

Los reductores de velocidá cuesten

ente 1.500 y 3.000 euros caún

Avientu 2014 / Gozón

PAULA FERNÁNDEZ (Lluanco)

La mayoría de badenes instalaos en delles cais de Lluanco a primeros de payares inclumplen la so función. Estos elementos, conocíos col nome de coxinos berlineses o europeos, tendríen que tar asitiaos enantes de los pasos de peatones, porque los vehículos aminorguen la velocidá. Sicasí, na avenida El Gayo tán en paralelu, daqué que solo ye lóxico en carriles con circulación nel mesmu sen. La decisión d’asitiar los reductores tratóse a la hora d’axustar los presupuestos municipales, onde Foru esixía la so implantación.

Los coxinos berlineses tienen como función principal que los vehículos llixeros tean obligaos a aminorgar la velocidá, pero dexen que los camiones y autobuses pasen pelos llaterales por cuenta de la separtación ente les ruedes, y dexen espaciu al borde de la cera pal tránsitu de bicicletes. La idea, en principiu, foi bien acoyida polos vecinos, pero la so implantación nun va pel mesmu camín. L’exemplu de l’avenida El Gayo nun ye l’únicu.

Los reductores de la cai Isla de la Herbosa tampoco tán bien asitiaos, yá que los instalaron na metá del tramu ente un pasu de peatones y otru. Polo que, un vehículu podría recuperar la velocidá nesti espaciu.

El casu de l’avenida El Gayo, onde esisten cuatro coxinos berlineses, ye’l más evidente. Los vehículos que circulen en dirección a la cai La Cruz tienen un reductor dempués d’un pasu de cebra, daqué ilóxico, yá que tendría que tar asitiáu enantes. Otru exemplu ta na cai Atenéu Obreru, xusto enfrente al colexu La Vallina. Ellí, los coxinos tán ensin tener en cuenta que tienen que dexar una distancia al respective de los vehículos que tán aparcaos en batería, pa dexar a los camiones y autobuses poder llibrar el resaltu.

La Orde FOM/3053/2008 del Ministeriu de Fomentu da unes instrucciones técniques pal so allugamientu, anque nun fala directamente de coxín berlinés, pero sí d’un sistema asemeyáu: llombu de pollín.

Esta normativa encamienta poner señalización vertical enantes de los reductores, nos que s’avise de la llimitación de velocidá, alvertir de que va haber un resaltu, amás de la señal de «peligro por la proximidad de un lugar frecuentado por peatones».

El desembolsu d’asitiar coxinos berlineses en Lluanco ye importante. Caún d’estos elementos tien un preciu nel mercáu que supera los 1.500 euros y algama cuasi los 3.000, según el modelu.

L’allugamientu de resaltos foi una de les quexes más sonaes de la llexislatura pasada en Carreño. El Conceyu invirtió en faer pasos de peatones elevaos en delles cais de Candás y que, finalmente, incumplíen la normativa, yá que’l so altor yera mayor que la permitida. Dellos conductores estropiaren los baxos de los sos coches

Los badenes de l’Avenida El Gayo tán en paralelu, lo normal en carriles d’un mesmu sentíu. (O. M.)