116_agresor_policias

Númberu 116. Xineru 2015

PASÁU CONFLICTIVU DEL AGRESOR DE POLICÍES

El deteníu por mancar a seis axentes nel barriu

d’El Llano (Xixón)tuvo problemes llaborales en Carreño

Xineru 2015 / Carreño

PAULA F. SUÁREZ (Candás)

Esiste un rastru conflictivu en Candás del senegalés acusáu d’afrellar a seis policías na cai Juan Alvargonzález de Xixón na tarde del 9 d’avientu. Según fontes de toa solvencia, esti home tuvo problemes llaborales na capital de Carreño cuando yera emplegáu d’una empresa rellacionada cola mar. Los sos compañeros refuguen apurrir más datos sobre’l so comportamientu por mieu a volver tener alcontrones con esta persona que munchos describen como desaxeradamente violenta y con un calter fuerte que-y provocaba discutinios constantes col restu de trabayadores. El deteníu a principios de mes, de nacionalidá senegalesa, dexó de trabayar en Candás va dellos meses precisamente pola so conducta.

Los fechos asocedieron n’avientu cuando los policíes quixeron detenelu nel barriu d’El Llano. La intervención en Xixón fízose arriendes de que la ex pareya del senegalés, de nacionalidá española, avisó a les autoridaes de que la amenaciara de muerte. Dos selmanes enantes d’esti incidente, l’home fuera arrestáu por amenaciar con volar l’edificiu nel que moraba cola muyer, abriendo’l gas. Y asina asocedieron hasta tres denuncies en dos meses polo mesmo.

La primer dotación qu’allegó al barriu d’El Llano necesitó refuerzos p’amenorgalu y recurrieron a otros compañeros hasta ser 10 persones. D’ellos, resultaron mancaos cuatro axentes de les patrulles de Seguridá Ciudadana y dos miembros de la Unidá de Prevención y Reacción (UPR), que reciben clases y tán preparaos específicamente pa intervenir en situación de riesgu como la socedida’l 9 d’avientu.

ENVERGADURA

La envergadura del senegalés, que mide cerca de dos metros y pesa más de 100 quilos, xunida a que ye profesor d’artes marciales, fixo que los mancaos tuvieren hematomes y contusiones nes zones que llevaben protexíes polos chalecos de defensa, amás d’esguinces cervicales, contusiones n’estremidaes y erosiones, esto ye, arañazos. Toos fueron treslladaos al hospital de Begoña.

L’acusáu declaró’l 19 d’avientu nun xuiciu rápidu por mancar a seis axentes del orde públicu. Dixo ante’l xuez que nun fuera él quien afrelló a los policíes, sinón que fueron ellos los que lu atacaron. «Estábamos forcejeando. Lo que pasa que vinieron, yo estaba nervioso, me atacaron y me pegaron. Yo nunca les pegué». L’acusación pide un añu de cárcel pa él por frayar la orde d’alloñamientu y amenaciar a la so exmuyer.