118_pautu | elfaro

Númberu 118. Marzu 2015

Fírmase un segundu pautu col Gobiernu

Compromisu alcuerda col PSOE iguar una pasarela nel muelle, ente otros 13 puntos

Marzu 2015 / Carreño

PAULA FERNÁNDEZ (Candás)

Los nacionalistes roblaron un segundu pautu presupuestariu colos socialistes de cara a que se desarrolle nel 2015. L’alcuerdu firmóse enantes del plenu de presupuestos 2015 de febreru, a tres meses vista de les eleiciones. «Tenemos la obligación d’intentar llevar alantre’l nuesu programa», subrayó Roberto Holgado. El documentu tien 14 puntos, de los que dalgunos yá taben nel anterior alcuerdu firmáu por estos dos partíos en mayu de 2013. El conceyal de Compromisu por Carreño esplicó esta repetición en que «el bloque de la derecha y les organizaciones comunistes paralizaron munches de les actuaciones».

Ún de los puntos en que coinciden socialistes y asturianistes ye l’iguar una pasarela de madera, volada, nel muelle pa los peatones. La idea ye compatibilizar meyor el tránsitu peatonal col rodáu. Les obres de los güertos públicos entamarán nunos días y abriráse un nuevu plazu pa la so solicitú.

El control medioambiental vuelve a apaecer nesti acluerdu. Holgado adelantó que Candás tendrá una estación fixa de midición ambiental na zona d’El Carbayo, frente a la estación de tren. Amás, ellaborarán un censu d’emisiones y habilitaráse un puntu d’información de la contaminación a tiempu real nun llugar céntricu de la capital.

El pautu presupuestariu inclúi una ordenanza forestal que Compromisu metió per rexistru’l pasáu mes. La normativa afita que toles plantaciones tienen que respetar unes distancies en función del tipu d’árbol. Por exemplu, la distancia sedrá mayor nel casu de los ocalitos y menor nos pinos. A les especies invasores d’altu riesgu como l’acacia dealbata (mimosa), acacia melanoxylum y robinia pseudoacacia (acacies) aplicaránse los mesmos metros qu’al ocalitu. La normativa tamién inclúi un puntu con beneficios pa les mases forestales que seyan certificaes y xestionaes de manera sostenible.

Los socialistes y los nacionalistes consensuaron amás un plan d’ameyoramientu pa los parques y zones verdes de Candás, como La Fuente los Ángeles, Santarúa y l’entornu de San Roque.

Les inversiones n’Ortiz ye otru puntu. Per agora, adelanten qu’esti añu dotarán d’aseos l’inmueble. De la mesma manera, habilitaron una partida presupuestaria p’acabar coles barreres arquitectóniques y ellaborarán un estudiu pa implantar presupuestos participativos cola ayuda de la Universidá del País Vascu.

El documentu, amás, marca el crear un conveniu colos equipos de deporte tradicional del conceyu pa que tengan más presencia dientro de les xeres culturales.

PLAN ARQUEOLÓXICU

Holgado avanzó qu’ellaborarán un nuevu plan arqueolóxicu del conceyu, y aprobaráse un plan de normalización del asturianu.

L’alcuerdu aumenta les ayudes al emplegu nun 25%. «Gracies a los nuesos alcuerdos presupuestarios concediéronse yá cuasi 100 subvenciones a emprendedores», dixo. Aumentó la partida d’ayudes sociales en 30.000 euros con cargu al aumentu de la recaldación del IBI.

Per otru llau, yá se contrató un estudiu pal cambéu del sistema de recoyida de basoria, que se fadrá de manera selectiva en función del residuu. «Nun se pue tirar la basoria a los cubos igual que fai 50 años, hai que concienciar a la xente na corresponsabilidá de los residuos que xeneramos, la llucha escontra la incineradora entama dende les nueses cases», esplicó.

«Tenemos la obligación d’intentar llevar alantre’l nuesu programa», xustificó Roberto Holgado