Númberu 119. Abril 2015

Nieva busca un fin pa los astilleros Ojeda y Aniceto

Los vecinos tienen mieu a qu’un posible derrumbe provoque mancaos al tar cabo’l local social de los xubilaos

Abril 2015 / Gozón

PAULA FERNÁNDEZ (Llaviana)

Los vecinos de San Xuan de Nieva busquen un fin pa los antiguos astilleros Ojeda y Aniceto. La nave en cuestión ta cabo la ría, en terrén d’Avilés, pero pellí transiten munchos gozoniegos d’esti pueblu de Llaviana.

L’edificiu, propiedá de l’Autoridá Portuaria d’Avilés, allugaba a los carpinteros de ribera dende 1970, añu en que se fundaron los astilleros. Agora, el local ta en desusu, arrodiáu por una valla que namás val pa evitar que les persones s’averen a él. En casu de derrumbe, la valla nun sedría abondo consistente pa soportar los escombros.

Los vecinos tienen mieu, por ello, a que la nave caiga. Y ye que nunu de los llaterales, concretamente na parte izquierda según se mira dende la ría avilesina, ta’l local social de los xubilaos de la zona. Al presidente de l’asociación «La Atalaya» de Xagón, José Manuel González García, preocúpa-y la seguridá d’estes persones, que van davezu a ver la tele o pasar la tarde.

Amás, incide en que «el edificio está catalogado, con lo que no lo pueden dejar caer». Mentanto, los vecinos de San Xuan de Nieva vieron cómo adulces la nave de los estintos astilleros Ojeda y Aniceto cada vez ta en peores condiciones. Ellos mesmos plantegaron propuestes a l’Autoridá Portuaria, pero nun dieron los sos frutos. «Hace más de 10 años pedimos que se hiciera la Escuela de Vela aquí, pero no cuajó, finalmente la pusieron en Avilés, al otro lado de la ría», comentó González García. Daquella, l’interior de la nave «estaba llena de tablas de madera y plantillas de labores de carpintería», recordó.

El presidente de «La Atalaya» almitió que «cuesta mucho reparar el edificio, más de 100.000 euros. Por eso queremos que se le dé un fin, no que gasten el dinero en arreglarlo porque sí».

Hubo otres iniciatives privaes. El Grupu Inmobiliariu Niemeyer S. L. quería tresformar los astilleros nun restaurán y cafetería, fai aproximadamente un llustru.Esti proyectu hosteleru cuntaría, amás, con un trayectu en barcu dende l’otru marxe de la ría hasta un pantalán qu’habilitaríen na zona de San Xuan de Nieva.

Sicasí, too quedó en papel moyáu, como asocedió cola torre del Difuntín. Koldo Miranda ponla agora a la venta por 350.000 euros y va años mercóla pa tresformala nun complexu turísticu.

«Hace diez años pedmos que se hiciera una Escuela de Vela, pero no cuajó»