Númberu 119. Abril 2015

El 40% de les places d’emplegu

de los patronatos son vacantes

10 trabayadores son fixos de plantiya o con contratu de «serviciu determináu» de los 17 puestos qu’hai ente’l Complexu Deportivu, el Muséu Antón y el Prendes

Abril 2015 / Carreño

PAULA FERNÁNDEZ (Candás)

El 40% de les places d’emplegu qu’hai nos patronatos del Conceyu de Carreño son vacantes, esto ye, que nun hai una persona contratada como fixa de plantiya pa facer esa función en concreto. Y ye que de los 17 puestos qu’hai nel Complexu Deportivu Municipal, el Muséu Antón y el Teatru Prendes, solo 10 tán ocupaos por personal llaboral fixu o con contratu de «serviciu determináu».

Asina les coses, el patronatu con más places vacantes ye’l centru d’escultura Muséu Antón, onde solo una persona tien la plaza en propiedá, mientres hai otros cuatro que nun tienen aseguráu’l so puestu, de los qu’ún ta con un contratu a tiempu parcial. El personal del polideportivu pasa per una situación bien estremada. Cuenta con seis puestos de trabayu, de los que namás ún ta vacante. Seis emplegaos igüen la plantiya del Teatru Prendes, de los que cuatro tienen un contratu de «serviciu determináu».

Les places vacantes de los patronatos, por ello, nun tán ocupaes por personal llaboral fixu, como tendría que ser. Pa ello, l’Ayuntamientu tendría que sacar estos puestos de trabayu al traviés d’un concursu públicu. Sicasí, la Llei 36/2014 de Presupuestos Xenerales del Estáu pa 2015 nun dexa qu’haya oposiciones nos conceyos, a nun ser que seya la Policía Local. L’artículu 21 d'esa llei conseña una tasa de reposición del 100% pa esti serviciu municipal, esto ye, que podríen cubrise toles places vacantes del cuerpu armáu, siempre y cuando’l Consistoriu nun perpase les llendes d’endeldamientu y cumpla colos principios d’estabilidá que marca la Llei Orgánica 2/2012. El panorama nel restu de la plantiya municipal ye asemeyada: 41 vacantes de los 258 puestos de trabayu qu’apaecen na llista de los presupuestos de 2015, asoleyada nel Boletín Oficial del Principáu d’Asturies (BOPA) el 7 de marzu.

Al marxe de los patronatos, apaecen 17 puestos que nun sacaron a oposición pero que, sicasí, cuenten con una partida presupuestaria dada, como s’amuesa na llista de los emolumentos que cobra’l personal municipal. Hai otres dos places: auxiliar de servicios xenerales y auxiliar de biblioteca, onde’l desembolsu del Conceyu ye nulu, esto ye, que nun tienen dotación presupuestaria pa ello y, por eso, nun podrán nomar a naide pa ocupar esi trabayu.

15 INTERINOS

Per otra parte, hai 15 places cubiertes por interinos, que puen llegar a perder el so trabayu si l’Ayuntamientu saca a concursu públicu esos puestos y nun lo fai al traviés de promoción interna. Esti ye ún de los temes demandaos polos sindicatos y pola oposición, col envís de que se regularice la situación llaboral de mediu centenar d’emplegaos del Ayuntamientu.